Col 2 | MHL | STEP | Aria ni feenap amisareka, yo anane ni ne wi Laodisia nia asipekam naep naap kekanem-ikaiyem. Ne wi emeria mua papako pun wia asipiyem, wi miira me efa urufimik nain.

Colossians 2

Opor wadola piipuap opor makena muutiw ookuk

1 Aria ni feenap amisareka, yo anane ni ne wi Laodisia nia asipekam naep naap kekanem-ikaiyem. Ne wi emeria mua papako pun wia asipiyem, wi miira me efa urufimik nain. 2 Naeya ni kekanep Mua Maneka teeria-pa epaskun arep niam kookalem-ikowen. Ne kema pukep maa muutitik amisar-afurowen. Naap ikok Mua Maneka opora eena kokot wiar ikua nain baliwep akena amisarowen. Opora kokot nain onoma Krais naneka. 3 O eena amis eliwa ne kema suuwowa eliwa wiar taanep ikua nain. 4 Naeya mua oko-ke nia peeskimemi opor sira-sira nia maakiwkin-na makena-ke me wiar naeka naep opor unowa fain nia maakiyem. 5 Makena, yo ni niamiya me ikaiyem, nain manek akena nia kema suuwam-ikaiyem. Ni maa muutitik kakeniw ona sira ookami oniman. Ne kekanep Krais opora naap opap ikaiman nain niar miimap kemeliyem.

I Krais epaskun arep maa eliwa urufiyen

6 Ni iiriw yiena Maneka Yeesus Krais opora wiar miimap opaman, naapeya o epaskun arep naap ikeka. 7 Feenap, ni kekanowa akena o wiar ikeka, nomokowa eena kekanowa onaiya arimiya naap. Ne pun koora eena poka kekanowa-pa koonep ikaiya naap akena ikeka. Naemi i opor eliwa nia maakemik nain kekanowa akena ookam-ikok anane maneka Mua Maneka sira eliwa naakem-ikeka.

8 Naapeya ni maa urufami, oko kema gariarep mua oko-ke sira maken marewa-pa nia pikiwiwkin kokor erowen. Wi sira naap nain iiriw wiena weke-pa ekapok, ne pun ona miiw sira-ke. Ne wi me Krais opora wiar maimik, weetak. 9 Ni Krais waisow miimam-ikeka. Moram, Mua Maneka-ke Krais aremi mia kanima onaiya ikua, nain o Mua Maneka maken akena-ke. 10 Ne o miimep wi anim onoma ne maa muutitik kekanowa onaiya ikomakemik nain wia urufam-ikaiya. Naapeya ni o epaskun arep sira unowa iiwawun pepek erowen. 11 Ni Krais opora wiar opiwkin nia yasuwamik. Naeya ni Krais epaskun arep umowa saarik ikeman. O umep eruwa-pa ikaeya Mua Maneka-ke ona kekanowa-pa iikirowak nain, nis pun nia iikirowak. Naapeya ni o epaskun ariwkin os-ke mia kanima niar puukowa saarik arek. Mia kanima puukowa sira nain mia kanima puukap iirarimik. Nain Krais sira nia onak nain me mia-pa nia onak, weetak. O pina sira-sira niar iirareya ni pina onowa kema marew.

13 Ni iiriw miiw sira-pa ikok pina sira-sira onam-ikeman ne sira nain-ke nia ifakimeya ni umowa saarik ikeman. Nain Mua Maneka-ke ni pina unowa niar iiraremi Krais wameiya nia iikiroweya ni anane eliwa ikowa-pa ikeman. 14 Feenap, i pina unowa onimik muuta nain i opora-pa ikemik. Ne os-ke Krais nomokow moke-pa umok nan muuna yiar weeser-wuami opora nain yiar umukak. 15 O nomokow moke-pa umok nain-pa wi ewar kekanowa ne maa papako kekanowa onaiya ikemik nain kekanowa iiwawun wiar weeser-wuak. Wi kekanowa naap wiar nomakek nain iiwawun wia porop ariman akena emina wia ururowak.

I Krais wameiya ikok sira wiar ookiyen

16 Naapeya ni feenap oneka, maa enowa ne eka enowa sira, fofa maneka wuowa ne siiw enuma ookowa, maapora fofa ne Sabat fofa sira ookowa, nain niena baliwep kema suuwap ookeka. Mua oko-ke kema nia mikami me nia maakuk. 17 Sira unowa fain oram kukusa-ke, maa makena wiimar imenarowa nain pepekimok. Nain Krais-ke makena, os-ke maa makena yia pekapomak. 18 Wi mua wiena wadolalep wiam poromi wi ensel unuma wia purupemi sira-sira onimik. Ne nis pun i yiokeka naep naap nia maakimik. Ni me wia miimeka. Moram wi mua nain wiena miiw sira-pa ikok oram maneka wiam purupemi maem-miawimik, “Yo mokoka-keriw kirep maa-ko urufam.” Naemi oram maneka wiam maimik, “Maa muutitik is-ke amisaremik.” Wi mua nain Krais ookowa iiriw piipuamik. Aria Krais-na woosa-ke, ne os-ke ni ona teeria kekanowa nieya kekanowa onaiya ikok epaskun aremi unowiya baliwep o ookiman. Ne Mua Maneka-ke nia kekanowam-ikaeya Yeesus ookowa amisa nain naap niar manekarem-ikainon.

20 Ni Krais epaskun akena ikeman. Naapeya ni iiriw umep ikowa saarik ikaiwkin miiw sira samora unowa me nia mufem-ikaiya. Ne kamenap naep ni aakisa miiw sira unowa tepak-pa ikowa saarik sira unowa fain ookam-ikaiman? Wi feenap maimik nain, 21 “Maa fain me one. Maa fain enowa emi,” e “Maa nain me tiime,” opora naap nain. 22 Sira unowa nain oram-ke. Wiena woosa-pa imenap nia ofakowimik. Nain miiw maa-ke, naeya maa onamkun miiwa-pa mesenalowa-ke. 23 Feenap, wi wiena kema-pa lotu sira-sira imenimik ne wiena wadola-pa wiam porop wiena mia sirirowa wiam iwimik. Makena, wia urufowa-ke wi maa amisarep maa onowa saarik, naap wia urufinan. Nain wi lotu sira-sira onimik nain pokow eliwa me wia asipinon. Naeya maa kookalowa sira naap wiar ikim-ikainon.